Wilderness - Vessel States

Algengt er að menn líki Wilderness við PiL og þá aðallega fyrir söngstíl James Johnson, sem einskonar kallsöngur, en ekki er heldur langt á milli í tónlistinni, klifunarkennt rokk með þéttum gítarflekum og áherslu á trommu- og bassaleik.

Wilderness-félagar, James Johnson, Brian Gossman, Will Goode og Colin McCann, eru frá Baltimore og hafa starfað saman í rúman áratug, þó ekki séu nema fimm ár síðan hljómsveitin Wilderness varð til. Fyrsta platan samnefnd sveitinni, var tekin upp sumarið 2004 og tilbúin þá um haustið. Hún kom svo út síðsumars 2005.

Ekki var eins löng bið eftir næstu plötu, því Vessel States kom út í apríl sl. Hún er að mínu mati mun betri plata, heilsteyptari og þéttari - greinilegt að þeir Wilderness félagar hafa haft gott af tónleikaferðinn sem fylgdi í kjölfar frumraunarinnar.